Bereikua eta Arriola nagusi, Eusko Basqueren txapelketan

Eusko Basquek puntako jaialdia antolatu zuen atzo Gernikako Jai-Alai pilotalekuan. Urriko azken asteleheneko jaialdiak ikusle dezente batu zituen, eta giro ona egon zen harmailetan. Bertaraino gerturaturiko ikusleek lau modalitatetako partidak ikusi ahal izan zituzten. Jaialdiko estelarra zesta partida izan zen. Bertan, Bereikuak eta Arriolak Eusko Basquek antolaturiko enpresa barneko binakako txapelketaren finala irabazi zuten (30-24).

Telebistarekin hitzarturiko akordioaren poderioz, estelarra izan zen jaialdiko lehen partida. Enpresa barneko finalean Berriatuako lau pilotarik neurtu zituzten indarrak. Partidak hasiera orekatua izan zuen arren, ez zen ezusterik egon. Bereikuak eta Arriolak ez zuten arazo handirik izan Aimar eta Felix mendean hartzeko (30-24). Hemezortzinako berdinketara arte bi bikoteak maila onean aritu ziren, azken txanpan, baina, Bereikua maisuki aritu zen. Aurrelari trebea oso sasoiko dago, eta errestoan eginiko tantoei esker enpresa barneko txapela jantzi zuen. Jaialdiko bigarrenean, pala izan zen protagonista. Gaubekak eta Galanek, Fusto eta Aierbe hartu zituzten mendean (40-34). Fusto konfiantzarik gabe aritu zen, eta partida oso txarra jokatu zuen. Argentinarrak 15 huts egin zituen, eta Aierbek eginiko partida hasiera izugarria ilundu zuen. Hala eta guztiz ere, partidak hasiera orekatua izan zuen (20-20), bigarren zatian, baina, binakako txapeldun ordeak ezin hobe baliatu zuten Fustoren egun txarra.

Zeberio eta Urrutia irabazle (32-40)

Galarreta eta Euskaletik kanpoez ohikoa den arren, atzo, Gernikan, erremonte partida jokatu zen. Zeberiok eta Urrutiak, Altuna I.a eta Lizasoren aurka irabazi zuten (32-40). Tanto polit ugari egon ziren arren, ez zen emoziorik egon, partida hasieran hautsi baitzen (15-25). Emozio faltak erremonte ohitura gabeko ikusleak hoztu zituen, eta lehiak ez zuen ikusmin handirik sortu.