Lehen luzean hiru segundo eta bigarrenean hamar. Kito. Hasterako amaitu ditu lanak Hondarribiak Bilboko banderan. Erakustaldi handia eman du, beste behin, eta oso indartsu dago San Miguel ligako sailkapenaren buruan. Azkenerako, bederatzi segundo atera dizkio Kaikuri, eta hamahiru Urdaibai eta Astillerori. Atzerago gelditu dira Orio, Tiran, San Pedro, Zierbena, Cabo, Portugalete eta Zumaia.
Sailkapen nagusian 69 puntu dauzka Hondarribiak, 64 Urdaibaik, eta 58 Kaikuk. Beheko postuetan, berriz, kolpe handia hartu du Zumaiak, bederatzi punturekin gelditu delako, eta hamasei dauzkalako Portugaletek. San Pedrok, berriz, zazpigarren amaituta, 21 puntu dauzka dagoeneko.
Euskotren ligako hirugarren jardunaldian, oso estua izan da estropada, eta azken palakadetan irabazi du bandera San Juanek, Hibaikaren denbora berean. 38 ehuneneko aldea izan da bi traineruen artean. Cabok gaur aurrea hartu dio Oriori, eta zazpi segundo atera dizkio. Sailkapen nagusian hamabi puntu dauzka San Juanek, bederatzi Hibaikak, bost Oriok, eta lau Cabok.
Bihar, igandez, Getxon izango dituzte estropadak gizonezkoek zein emakumezkoek, itsasoan, eta ontziak elkarren ondoan direla.
