Marcelo Bielsa Athleticeko entrenatzailea gogor aritu zen bere jokalariekin maiatzaren 26an, aurreko egunean Bartzelonaren aurka Espainiako Kopako finala 3-0 galdu ondoren, "herri bat dezepzionatu" izana egotzi baitzien. "Mutilok, onartezina iruditzen zait herri bat mobilizatu eta herri hura dezepzionatzea". Behin baino gehiagotan aipatu zien "herri bikaina" dela. Solasaldi hartako grabazioaren zatirik handienaren berri eman du gaur Deia-k.
Bielsak aitortu zien "lotsatuta" zegoela final hartan eta bi aste lehenago Europako Ligako finalean emandako itxuragatik —Atletico Madril 3-0 nagusitu zitzaien Europakoan—. "Ez genuen irabazteko jokatu. Ez ginen sortu genuen ilusioaren pare egon. Orbain bat da, zauri bat".
Bi finalak galdu zituztelako "denboraldia oso gaizki" amaitu zela adierazi zien Athleticeko entrenatzaileak. "Porrot bat izan da". Dena dela, "erantzulea" bera izan zela onartu zien.
Urrutiak prentsaurreko bat emango du bihar
Athleticek gaur jakinarazi du Josu Urrutia klubeko presidenteak prentsaurreko bat emango duela bihar, Bilbon (12:30, Ibaigane). Ez du zehaztu zertan ariko den.
