Bigarrenean ezin izan du

Amaya Sport San Antoniok ezin izan du duela bi asteko balentria errepikatu. Ligan mendean hartu zuen Iruñeko taldeak Ciudad Real, baina Espainiako Kopan aurkaria nagusitu da nafarren aurkako final-laurdenetako partidan. Ondorioz, lehiaketatik at gelditu dira Juanto Apezetxearen jokalariak.

Nafarrek, norgehiagoka hasi aurretik, bazekiten hagitz zaila izanen zela Ciudad Real kanporatzea. Bi taldeen arteko aldea nabarmena da, eta atzo agerian gelditu zen pistan. Lehen zatian, jada, partida bere alde jarri zuen Ciudad Realek. 12-20 ailegatu ziren atsedenaldira, irabazten.

Markagailu horrekin zerikusi handia izan zuten nafarren hutsek. Lehendabiziko minutuetan baino ez zuten lortu aurkariari aurre egitea. Juanto Apezetxearen jokalariek berehala galdu zuten lehen uneko tentsioa, eta ezinean aritu ziren. Hamaika aldiz galdu zuten baloia erasoan, eta, ondorioz, Ciudad Reali kontraerasoan aritzeko aukera ezin hobea eman zioten. Aurkariak, noski, aukera hori profitatu egin zuen.

Bigarren zatian gauzak ez ziren gehiegi aldatu. Hainbat unetan San Antoniok lortu zuen markagailuan hurbiltzea, baina buelta emateko aukerarik ez zuen izan partida osoan. Ciudad Realen erritmoak behera egin zuen bigarren zatian, eta horrek mesede egin zien iruindarrei. Hala ere, ez zen nahikoa izan, eta 30-36 amaitu zen norgehiagoka, Ciudad Realen alde. Kopatik at gelditu eta gero, burua Ligan eta Europako Errekopan jartzeko unea du oraingoa San Antoniok.

Gaurko partidak

Atzoko lehendabiziko kanporaketan Granollersek 36-40 irabazi zion Aragoiri. 30-40 zegoen partida kataluniarren alde, baina azken txanpan 6-0ko partziala egin zuen Aragoik. Ez zen nahikoa izan, hala ere, markagailuari buelta emateko.

Ciudad Realek, beraz, Granollersen kontra jokatuko ditu finalerdiak. Gaur jokatuko dira final-laurdenetako bertze partidak: Bartzelonak Ademarren aurka jokatuko du, arratsaldeko 19:00etan; eta Octaviok, berriz, Valladoliden aurka, gaueko 21:00etan. Bi partida horietako irirabazleak ariko dira bertze finalerdian. Ostiralean jokatuko dira, eta finala, berriz, igandean.