Ekainean irabazi zuen Athleticek Espainiako Ligako titulua, eta orduan egin zituzten ospatzeko ekitaldiak. Lorpena saritzeko, omenaldia egin diete jokalariei Bilboko Aste Nagusian. Somera Laguna saria eman die Gora Somera ostalarien elkarteak. Herritar mordoa hurbildu da haien lana txalotzera.
Polemika artean egin zituzten ligako tituluaren ospakizunak. 2015-2016ko denboraldiko liga irabazi arren, taldeko zuzendaritzak gabarra ez ateratzea erabaki zuen, aurreko aldietan bezala. Bosgarren aldia da taldeak ligako titulua irabazten duena.
"Bederatzi urte generamatzan titulu honen zain, eta ikaragarria da". Iraia Iturregik liga irabazi berritan esan zituen hitzok. Zuri-gorriek 2002-2003ko denboraldian irabazi zuten lehenengoz liga, 2003-2004an eta 2004-2005ean ere bai gero, eta 2006-2007koa zen azken garaikurra.
