Bizkaiko Aldundiak gaur jakinarazi du zenbatekoa izango den Bilbo Basketi emango dion diru laguntza: 5,2 milioi eurokoa. Saskibaloi taldeak, hala ere, 1,5 milioi euro bakarrik jasoko ditu zuzenean —apirilean zati bat eta abuztuan beste bat—, beste 3,7 milioi euroak klubak Bizkaiko Ogasunarekin duen zorra kitatzeko bideratuko baitira.
Aldundiak "salbuespeneko egoeratzat" jo du hartutako erabakia, Bilbo Basket "desager ez dadin". Aldundiak urtero ematen zion 1,9 milioi euroko diru laguntza kendu zion aurten Bilbo Basketi. Uxuek, klubaren babesle nagusiak, gainera, 900.000 zor dizkio oraindik Bilbo Basketi.
