Gaur goizean aurkeztu dute asteburuan abiatuko den 2018ko lau eta erdiko txapelketa. Asegarcek Urrutikoetxea, Bengoetxea VI.a, Olaizola II.a, Victor, Arteaga II.a, Victor eta Agirre aukeratu ditu lehiarako, eta Aspek, berriz, Ezkurdia, Irribarria, Elezkano II.a, Retegi Bi eta Jaka. Altuna III.a ere, 2017ko lau eta erdiko txapelduna, jokalarien zerrendan dago. Sanmateo torneoko finalean lesionatu zen, irailaren 23an, eta oraindik ere ez dago argi lehiaketan parte hartzeko moduan egongo den. Final laurdenetan hasiko da, berez, txapelketan, urriaren 14an, eta Olaizolaren aurka arituko da. Lesioa sendatzeko tratamendua jasotzen ari dela azaldu du Altunak, eta lesioaren garapenaren arabera izango dela aurtengo lehian.
Ostiraletik igandera bitarte jokatuko dituzte final-zortzirenak. Ezkurdia eta Agirre ostiralean lehiatuko dira, Altsasun. Larunbatean, hilaren 6an, bi partida izango dira Iruñeko Labrit pilotakekuan: Arteaga Jaka Biren kontra, batetik, eta Victor Retegi I.aren aurka, bestetik. Igandean jokatuko da final-zortzirenen azken partida, Tolosan: Elezkano eta Irribarria izango dira lehian, Iruñean. Final-laurdenak urriaren 12an hasiko dira, eta azaroaren 3 eta 4 bitartean final-erdiak. Finala azaroaren 18an jokatuko da, zabaldu berri den Nafarroa Arena pilotalekuan.
Aspe eta Asegarce enpresen erabakiz, ez da botilerorik izango txapelketan. Enpresen arteko norgehiagoka denean, enpresen teknikari bat jarriko dute botilero lanetan, baina enpresa bereko pilotarien arteko partidetan ez da botilerorik izango. Agerraldian bertan jaso dute albistea pilotariek ere. Binakako partidetatik ere kendu dituzte. Iñaxio Errandonea Aspeko ordezkariak eman ditu azalpenak. “Batzuetan, egokiak ez diren botileroak azaltzen dira, edo ez dute era egokian lan egiten. Enpresa ez da inor esateko zer botilero egon behar den edo egokia zein den; hortaz, eztabaida horretan ez sartzeko, erabaki dugu botileroak kentzea”.
