Defentsako lanean oinarrituta lortu du Caja Laboral Baskoniak balentria. Lehen bi partidak galdu ondoren, Euroligako final-laurdenetako hirugarren partida zeukaten arabarrek, CSKA Moskuren aurka, eta oso oldarkor jokatuta lortu dute helburua. Biharko laugarren partida behartzea zen Zan Tabak-en helburua, eta ondo erantzun dute jokalariek. 10-4 aurreratu ondoren, 15-14 amaitu da lehen laurdena, baina hurrengo bi laurdenetan txikitu dute arabarrek aurkaria. CSKA 80 puntutik gora ibiltzen da normalean, baina lehen hiru laurdenak amaituta, 70-39 ageri zen markagailuan. Tentsiorik gabea izan da azken laurdena, eta errusiarrek pixka bat itxuratzeko baliatu dute aukera (93-72), baina tentsio handiagoarekin jokatu beharko dute bihar bosgarren partida jokatu nahi ez badute.
Argigarriak dira jaurtiketetako datuak. Caja Laboralek biko 33 jaurtiketa egin ditu, eta 17 asmatu (%51); CSKAk kopuru bera asmatu du, baina bost jaurtiketa gehiago eginda (%44). Hirukoetan, berriz, etxekoek 26 jaurtiketa egin dituzte, eta 15 asmatu (%57); CSKAk zazpi besterik ez ditu sartu, 25 ahalegin eginda (%28). Harmailetatik izugarri bultzatu dute zaleek ere, eta biharko partidan ere ezinbestekoa izango da euren babesa.
