Victor Campenaerts izan da indartsuena Italiako Giroko 15. etapan. Etapa zoroa izan da, eta denetik izan du: euria, anbulantziak, erretiroak... nahaste horretan eguneko ihesaldia heldu da helmugara beste behin —aurten zortzigarren aldiz—, eta Campenaertsek ondo jokatu ditu bere kartak azken kilometroetan.
Liderraren taldea garailearengandik 17 minutura heldu da. Ineosek erritmo lasaia ezarri du pelotoian, eta kilometro asko falta zirenean argi zegoen jada garaipena ihesaldikoren batentzat izango zela.
Txirrindulariek bazekiten garrantzitsua zela ihesaldian sartzea, eta lehen metrotik hasi dira lehian. Hori dela eta, lasterketa hasi eta bost kilometrora eroriko handi bat izan da pelotoian, eta lau txirrindularik utzi behar izan dute lasterketa, tartean Emanuel Buchmann sailkapen nagusiko seigarrenak.
Lasterketa berriz abiatu denean hamabost gizonek osatu dute ihesaldia. Igotzaile onak zeuden tartean —Mollema, Cataldo eta Hermans, besteak beste—, eta lauan indartsuak direnek bazekiten amaierako aldapak iritsi aurretik egin behar zutela euren jokaldia. Horregatik apurtu du taldea Campenaertsek hogei kilometro falta zirenean. Orduan agertu da euria ere, baina ez da erorikorik izan.
Harekin ihes egindakoek ez diote erlojupekoan espezialista den txirrindulariaren joari eutsi, eta, helmugara Riesebeekekin heldu den arren, hark ez du Campenaertsen garaipena zalantzan jartzeko indarrik izan.
Bihartik aurrera, mendia
Orain arte denetik izan du Giroak, baina oraindik mendiko etapa bakarra izan dute txirrindulariek. Aurtengo aldirako halako bost etapa daude programatuta, eta haietako lau datorren astean izango dira, azkenengoan.
Bernal liderra itxura sendoa ematen ari da, eta Ineosek lasterketa kontrolpean duela dirudi une oro. Ikusteko dago azken etapetan ere segurtasun bera erakutsiko duen kolonbiarrak.
