Climamio Bolonia, Zalgiris eta Panathinaikos izango dira Tau Baskoniaren arerioak Top 16an

Climamio Bolonia da multzoko areriorik gogorrena. Italiarrak Euroligako finala jokatu zuten iragan urtean Maccabiren aurka, eta kalitate handiko jokalariak dituzte. Milos Vujanic serbiarra da taldeko izarra. Gianluca Basile, Matjaz Smodis, Ruben Douglas eta Gianmarco Pozzeko ere gertu-gertutik zaindu beharko dituzte Tau Baskoniako jokalariek.

Tauk Panathinaikosen aurka jokatu zuen Euroligako lehen fasean. Atenasen galdu egin zuen, baina Gasteizen Ivanovicenak gailendu ziren. Obradovicek zuzentzen duen taldea arerio gogorra da, eta gainera Kutlay turkiarra fitxatu berri du. Zalgiris ere talde sendoa da, baina nahiko irregularrak. Partida bikainak eta partida eskaxak tartekatzeko gai dira. Hala ere, jaurtitzaile bikainak dituzte, eta kanpoko jaurtiketetan asmatuz gero arerio arriskutsua da.

=bIvanovic: "Lehenengo bi partidak etxean jokatuko ditugu, eta hori oso garrantzitsua da"

Tau Baskoniako entrenatzaile Dusko Ivanovic Bartzelonan izan da zozketa bertatik bertara jarraitzen. Tauko entrenatzailea pozik agertu da. "Lehen bi sailkatuetako bat izateko aukerak ditugula uste dut. Egia esan, lau multzoak nahiko orekatuak dira, gogorrak. Baliteke Efes Pilsen eta Benettonen taldea guztietan ahulena izatea. Hala ere, Top 16ko arerio guztiak gogorrak dira. Uste dut sailkatzeko aukera asko ditugula; ez dut esango talde erraza denik, baina okerragoa izan zitekeen".

Multzoko lehenengo bi partidak Gasteizen jokatuko ditu Tauk. Ivanovic pozik agertu da egutegiarekin. "Nire ustez oso garrantzitsua da lehenengo bi partidak etxean jokatzea. Bi partidak irabaziz gero, eskura izango genuke sailkapena".