Dani Moreno Euskal Bizikletako lehen liderra

Caisse d´Epargneko Dani Moreno da Euskal Bizikletako lehen liderra, berak irabazi baitu gaur aurreneko etapa: Bakio-Bakio, 154 kilometrokoa.

Azken 25 kilometrotan Eros Capecchi (Saunier Duval) izan da lasterketa burua. Sollubeko mendatean -helmugatik 14 kilometrora- 20 segundo ateratzen zion bigarren taldeari, baina harrapatu egin dute. Ondoren, Lucca Pierfeliccik egin du ihes, eta Bakioko sarreran 14 segundoko tartea ateratzen zion taldeari. Azken kilometroan bat egin dute iheslariarekin, eta bukaera esprinean erabaki da. Bertan Moreno izan da azkarrena.

Bihar izango dute bigarren etapa: Agurain-Agurain, 162 kilometrokoa. Opakua lehen mailako mendia edukiko dute hasieran, baina gero lautadan ibiliko dira.

Igandean bukatuko da Euskal Bizikleta: Eibar-Arrate, 150 kilometroko etapa. Usartza lehen mailako mendatean bukatuko da, eta aurretik Ixua lehen mailakoa ere igoko dute.