Danimarka eta Serbia arituko dira Europako Txapelketako finalean

Danimarka-Serbia. Horixe izango da bihar arratsaldeko bostetan jokatuko den Europako Txapelketako finala. Eskandinaviako taldeak asko sufritu behar izan zuen atzo Espainiari irabazteko. Partida gogor eta orekatuaren ondoren, azken txanpa aparta egin zuen, eta amestutako finalera sartu zen (25-24). Serbiak, berriz, errazago garaitu zuen Kroazia. Lehen zatian nor baino nor gehiago aritu ziren bi taldeak, baina bigarrenean etxekoak izan ziren jaun eta jabe (26-22).

Norgehiagoka estua jokatu zuten Danimarkak eta Espainiak.Lehen minutuetan munduko txapeldunordeak hartu zuen aldea, baina espainiarrek ez zuten etsi, eta neurketa orekatzea lortu zuten, nahiz eta atsedenaldira bi gol atzetik iritsi (10-12). Bigarren zatiaren hasieran, ordea, kontrakoa gertatu zen; Espainia Danimarka baino hobea izan zen. Eskandinaviako taldeak, dena den, azken unean finalerako txartela lortu zuen. Espainiak txapelketan ez du partida alerik galdu, atzo arte, eta Danimarkak, aldiz, lehen faseko ligaxkan, bi partida galdu zituen. Iaz ere Danimarkak Espainiari irabazi zion Suedian jokaturiko Munduko Txapelketan.

Etxean aritzea abantaila izaten da kirolean, eta horixe bera baliatu zuen Serbiak Kroazia mendean hartzeko. Lehen orduerdia lehiatua izan zen. Gogorra eta erritmo bizikoa. Atsedenalditik bueltan, ordea, gehiago izan zen Serbia, eta ez zuen barkatu. Finaleko irabazlea zuzenean sailkatuko da Olinpiar Jokoetara.

Kukullaga-Bera Bera gaur

ABF Ligako bigarren itzuliari gaur ekingo zaio, eta Etxebarrin euskal derbia jokatuko da, Kukullagaren eta Bera Beraren artean (20:30). Donostiarrak dira faborito, sasoi ona egiten ari baitira. Bigarren postuan daude sailkapenean. Bizkaitarrak, berriz, partida bakarra irabazita daude. Itxakok, bestalde, Gijon azken sailkatua hartuko du etxean (18:30). Liderrek ez lukete arazorik izan behar garaipena lortzeko. Datorren asteartean Bera Bera eta Itxakok elkarren kontra ariko dira, Bidebietan.