Denak pozik dira

Espainiako Kopako zozketak ez du aurpegi txarrik utzi. Guztien artean, gehien poztu diren taldeak Alaves eta Eibar izan dira. Gasteiztarrek Bartzelona boteretsuaren bisita jasoko dute Mendizorrotzan, joaneko partidan. Arabarrentzat partida polita izango da, ez bakarrik Messi, Pique, Xavi eta Alves izarrak ikusteko aukera dutelako; Alaves eta Bartzelonaren arteko norgehiagokak klubaren ekonomian asko lagundu dezake, eta klubak zelaia betetzea espero du hilaren 31n jokatuko den joaneko partidan.

Antzeko zerbait gertatzen da Eibarren, Espainiako Kopak bizilagunen arteko derbia ekarriko baitu: Athleticek Ipurua bisitatu beharko du, kanporaketaren joaneko partidan. Alavesen kasuan bezala, derbia diru iturri garrantzitsua izan daiteke etxekoentzat. Aurretik bi aldiz jokatu dute elkarren aurka bi taldeek —1979-1980ko eta 1984-1985eko denboraldietan—, eta bietan Athletic atera zen garaile. Hirugarren aukeraz baliatu nahiko dute eibartarrek, nahiz eta aurkaririk egokiena ez dela jakin.

Realak bidaia luzeagoa egin beharko du Kopako joaneko partida jokatzeko: Kordobara. Espainiako taldea ez da fin ibili azkenaldian, eta Bigarren Mailako sailkapeneko erdialdeko postuetan dago kokatuta. Asteazkenean jokatutako kanporaketan, Kordobak 0-1 irabazi zuen Sabadellen aurka, eta final-zortzirenetan Bartzelonaren aurka jokatzea dute helburu. Joan den denboraldian Mallorcan gertatutakoa ahaztu, eta lehiaketa bide onetik hasteko aukera dute donostiarrek.

Osasunak, berriz, Gijonen jokatuko du joanekoa. Sportingek gogotik sufritu zuen asteazkenean Mirandesen aurka irabazteko, eta talde espainiarraren krisiaren azken adibidea Manuel Sanchez Murias entrenatzailearen kaleratzea izan da. Nafarrek hiru aldiz jokatu dute Sportigen aurka, eta behin bakarrik atera dira garaile —1997-1998ko denboraldian—.

Atzoko zozketaren ostean, Kopako joaneko partida guztiak urriaren 31n jokatuko dira, eta itzulikoak, berriz, azaroaren 28an.