Dirudien baino zailagoa

Azken bi irteeretan ez bezalako presioa izango du gaur Osasunak Valentzia Hiria futbol zelaian. Sanchez Pizjuanen eta Nou Campen Iruñeko taldeak itxura ona eman zuen, baina puntu bakar bat ere ez zuen lortu Sevillan (Espainia) eta Bartzelonan (Herrialde Katalanak). Talde handien zelaietan Osasunak puntuei ihes egiten uztea logikotzat ere jo daiteke, ordea. Eta horrexegatik, bi porrotek ez zuten giro txarrik eragin gorritxoen inguruan, nahiz eta puntu premia larrian izan sailkapenean.

Gaur arratsaldean, ordea, nafarrak ez doaz inondik inora Espainiako Ligako oilarretako baten zelaira. Aitzitik, Ligako talderik pattalenaren zelaira doaz. Levante krisi egoera larrian da Liga hasi zenetik, eta jada Bigarren Mailan daudela sinesten ere hasiak dira Valentzian (Herrialde Katalanak). Horrexegatik, badirudi Osasunak derrigor irabazi behar duela gaur arratsaldeko lehia. Baina ez da samurra izango: Levante txukun ari da azken boladan, azken hilabetean partida bat irabazi, bi berdindu eta bakarra galdu du Gianni De Biasik zuzentzen duen taldeak; eta horrez gain, Osasuna etxetik kanpo Ligako talderik kaskarrenetakoa dela ez da ahaztu behar.

Osasunako jokalariek bezalaxe, zaleek ere ezin dute gehiegizko konfiantzarik izan, Nafarroako Erresumatik kanpo jokatzen dutenean gorritxoen jokoa asko okertzen delako. Etxetik kanpo jokatu dituen 11 partidetatik lautan soilik sartu dute gola gorritxoek, eta hain zuzen ere Levanteren atzetik etxetik kanpo gol gutxien sartu duen taldea da Jose Angel Zigandarena: Levantek bost sartu egin ditu etxetik kanpo denboraldi honetan, eta Osasunak azken sailkatuak baino bi gehiago besterik ez ditu sartu, zazpi gol. Golik egin gabe puntuak batzea zaila da -Athleticen aurka San Mamesen Ligako lehen jardunaldian lortutako husnakoarekin soilik lortu dute puntu bat batzea, eta etxetik at ez dute golik sartu-, eta horrexegatik, bere zelaitik kanpo puntu gutxien batzen duen Ligako hirugarren taldea da Osasuna. Ruiz de Loperan eta Riazorren irabazi egin zuten gorritxoek, eta San Mamesen berdindu, jokoan izan dituzten 33 puntuetatik zazpi bakarrik batuz guztira. Levantek lau puntu soilik lortu ditu etxetik kanpo, Zaragozak sei puntu batu ditu Romaredatik kanpo, eta bi talde horien atzetik, Osasuna da Ligako talderik ahulena etxetik kanpo. Baikorregi izaterik ez dago beraz.

«Tranpa itxurako partida dela esaterik ez da, ezin dugu burua galdu. Hiru puntu daude jokoan, eta Nou Campen ondo jokatu eta galtzea larria ez dela dirudien bezala, badirudi azken sailkatuaren zelaian derrigorz irabazi behar dela, baina hori ez da horrela. Levanteren azken hilabeteko ibilbideak argi uzten du hori, partida bat irabazi, bi berdindu eta San Mamesen ondo jokatu ostean gol bateko aldeagatik soilik galdu baitzuten. Gainera, etxetik kanpoko partidetan gauza asko hobetu beharra daukagu guk. Aurkaria zein den aintzat hartu gabe irabazteko asmoz zelairatuko gara gu, dena dela, baina partida orekatua izango da, zalantzarik gabe. Levantek itxura ona eman du azken boladan, lortu duten puntu kopuruak aditzera ematen duen baino hobeto ari dira behinik behin», adierazi zuen atzo Zigandak, badaezpada. Larraintzarkoak badaki azken sailkatuaren zelaian jokatzeagatik ez dietela punturik oparituko. Irabazi egin beharko ditu Osasunak puntuak, Iruñera esku hutsik itzuli nahi ez badu.



HAMAIKAKOA ERREPIKATZEKO MODUAN. Hasierako hamaikakoari dagokionez, iragan asteburuan Iruñean Zaragoza mendean hartu zuen hamaikakoaren aldeko apustua egin dezake berriz ere Zigandak. Eta hori albistea izango litzateke, benetan, Larraintzarko entrenatzailea lehen taldea zuzentzen duenez geroztik gorritxoek ez baitute Ligako bi jardunalditan jarraian inoiz hamaikakorik errepikatu. Hala eta guztiz ere, zalantza bat daukala adierazi zuen atzo Zigandak: jokalaririk aurreratuena Dady ala Sola izango ote den ez du erabaki oraindik. Portugaldarraren aldeko apustua egiten badu, iragan asteburuko hamaikakoa errepikatuko du gaur Valentzia Hiria futbol zelaian.