Distantzia luzeko Europako Triatloi Txapelketa gaur Gasteizen

Bizikleta proba epaile dela, Distantzia luzeko Europako Triatloi Txapelketa jokatuko da gaur Gasteizen. 08:00etan zen hastekoa proba, baina Zadorrako urtegiaren inguruan egon daitekeen behe lainoaren eraginez, antolatzaileek hasiera ordubetez atzeratzea erabaki dute. 09:00etan hasiko da, beraz, proba. 4.000 metro egin beharko dituzte lehenengo igeri, 120 kilometro ondoren bizikletan, eta 30 kilometro, azkenik, korrika. 24 gradu inguru espero dira gaurko Gasteiz inguruan, eta beroa erabakigarria izan daiteke, beraz.

31 gizonezkok eta 13 emakumezkok parte hartuko dute, eta faboritoen artean ageri dira Eneko Llanos gizonezkoetan eta Virginia Berasategi emakumezkoetan -egungo Europako txapelduna da Berasategi-. Bien hitzetan, bizikleta gaineko probak erabakiko du gaurko triatloia. «Pedalkada erritmiko iraunkorra, argia eta neurtua eskatzen du ibilbideak», azaldu zuen atzo Llanosek. 2003ko Distantzia luzeko Munduko Triatloi txapelduna da gasteiztarra. Berasategik ere bizikletako probari begiratu zion. «Baina triatloilariek korrikako proban daukaten egoera fisikoaren arabera erabakiko da podiuma».

Itxura batean, gizonezkoen proban Jimmy Johnsen eta Martin Jensen danimarkarrak izango dira gaur Llanosen aurkaririk gogorrenak. Emakumezkoen proban, berriz, Edith Niederfriniger italiarra -eta iazko Europako txapeldunordea- izango da Berasategiren aurkaririk gogorrena.

Onditzen oroimenezkoa

Onditzen oroimenez Donostian jokatzen den Nazioarteko Triatloiak 25 urte beteko ditu bihar. 09:30ean hasiko da proba, Donostiako Atletikok Kontxako hondartzan daukan eraikinetik. 1.500 metro egin beharko dituzte igeri, 40 kilometro bizikleta gainean eta hamar kilometro korrika. Horren aurretik, ordea, emakumezkoen triatloia eta familien triatloia jokatuko dira gaur. Familiena 11:30ean hasiko da, eta emakumezkoena, 15:00etan.