Dumoulinek erakustaldia eman du bizikleta gainean. Lehen mugarrian izan ezik, guztietan izan da azkarrena. Helmugan, ia minutu bateko aldea atera dio Roglici (57,79) eta ia minutu eta erdi Froomeri (1.21,25). Nelson Oliveira portugaldarra sailkatu da laugarren eta Vasil Kirienka bielorrusiarra bosgarren. Askoz atzerago sailkatu dira proban lehiatu diren bi euskal txirrindulariak. Jonathan Castroviejo getxoztarra hamalaugarren izan da, Dumoulinengandik bi minutu pasatxora (2.01,39). Gorka Izagirre ormaiztegiarra, berriz, 27. postuan sailkatu da, irabazlearengandik ia hiru minutura (2.48,78).
Dumoulinek bigarren urrea du Bergenen, joan den igandean taldekako erlojupekoan ere nagusitu baitzen Sunweb taldearekin. Aurretik ere dominak irabazitakoa da Munduko Txapelketan. Hala, 2014an, Ponferradan (Espainia), brontzezkoa eskuratu zuen erlojuaren aurka. Hiru urte geroago podiumeko koska gorenera igo da. 26 urteko herbeheretarrak, beraz, denboraldi bikaina biribildu du, joan den maiatzean ere Italiako Giroan nagusitu baitzen.
