Egoi Martinezek Discovery Channel taldearen elastikoa jantziko du

Egoi Martinez Euskaltel-Euskadiko txirrindularia Discovery Channel talde estatubatuarrak fitxatu du. 2003ko Etorkizuneko Tourra irabazi ostean, Discoveryk txirrindulari nafarra bereganatzeko asmoa zuen.

Martinezi aurten amaitzen zaio kontratua Euskaltel-Euskadirekin, eta joan den Tourrean izan zituen bere lehen harremanak Johan Bruyneelen taldearekin. Miguel Madariaga Euskaltel-Euskadiko managerrak adierazpenak egin ditu fitxaketaren harira: "Euskaltelek Discoveryren eskaintza berdin dezake, baina Egoirentzat Discoveryren deia interesgarria da alde guztietatik begiratuta".

"Halako egoeren aurrean ezin dugu ezer egin. Nik Johan Bruyneelekin hitz egin dut, eta badakit asko zor digula esan diola Martinezek. Hala ere, Discoveryren eskaintza bat ez da egunero jasotzen", jakinarazi du Madariagak.

Egoi Martinez duela 27 urte jaio zen Etxarri-Aranatzen (Nafarroa). Amateur kategorian Caja Rural taldearekin aritu zen, eta bi urtetan zazpi garaipen lortu zituen. 2001ean profesional mailara igo zen Euskaltel-Euskadi taldearekin. 2003an Etorkizuneko Tourra irabazi zuen talde berarekin.