Eguerdian egingo da Top16ko zozketa, Bartzelonan, eta urtarrilaren 19an hasi

Eguerdiko 13:00etan egingo da Euroligako Top16ko zozketa, Bartzelonan, eta zozketa zuzenean jarraitu nahi duenak horretarako aukera izango du www.euroleague.net webgunearen bitartez. Milaka konbinazio posible daude, baina zozketa bera arautzen duten salbuespenen ondorioz, Baskoniak izan ditzakeen aurkariak zerrenda daitezke. Betiere multzo buruen ontzian egokitzen zaion aurkariaren arabera. Sienako Montepaschi eta Atenasko Olympiacos edo Panathinaikos egokituko zaizkio Ivanovicen taldeari. Panathinaikos egokitzen bazaio, hirugarren sailkatuen ontziak Bartzelona edo Unicajarekin parekatuko du erremediorik gabe Baskonia, beste hirugarren sailkatua, Efes Pilsen, Panathinaikosen multzo berean aritu zelako lehen fasean. Hori gertatzeko arriskua %33koa da. Beste %66ak ematen duen emaitza honako hau litzateke: Montepaschi edo Olympiakos, lehen onztian, Efes Pilsen hirugarrenean —beste bi hirugarrenak ACB ligakoak dira—, eta laugarrenean, Lottomatica Erroma, Lyetuvos Rytas edo Valentzia.