Emozioa lagun

Bukatu da BERRIA txapelketako lehen fasea, eta zerrendaburu guztiek badakite zein izango duten aurkari. Final-zortzirenetako azken hiru sailkatuak Gasteizko Zaramaga taldea, Zornotzako Lagun Onak eta Iparraldeko seikotea izan dira. Final-zortzirenak asteburu honetan hasiko dira.

Bergara 1

Zaramaga 2

KADETEAK

Jorge-Diez 6

Larrañaga-Kandela 22

GAZTEAK

Gallastegi-Rezusta 22

Garcia-Isasi 12

NAGUSIAK

Muguruza-Jauregi 14

Mikel-Perez 22

Oreka eta emozioa izan dira nagusi asteburuko kanporaketetan. Hirurak nagusien mailako partidetan erabaki dira, eta horietako bat, tanto aldeari esker. Ustekabekoak ere izan dira; Gasteizko Zaramagak eman zuen aurrenekoa, iragan ostiralean Bergarako seikotea Hernanin kanporatuta. Gasteiztarrek Arabako taldeen hasiera ona indartu dute —Amurriok ere aurrera egin zuen—, eta Andoaingo Gazteleku izango dute aurkari final-zortzirenetan.

Zaramagak kadete mailako partidan lortu zuen aurreneko garaipena. Larrañaga eta Kandela Jorge eta Diez baino gehiago izan ziren partida motz batean. Mikel Larrañaga izan zen onena, eta hamar tanto lortu zituen saketik. Bergarak gazte mailan orekatu zuen kanporaketa, eta Beñat Rezusta atzelariak ikuskizuna eman zuen: ezker beso indartsukoa izanik, hamar tanto egin zituen, horietatik hiru errebotean sartuta. Arabarrek ere txukun jardun zuten, eta azken txanpara arte ez zen hautsi partida.

Aurretik espero zen bezala, nagusien partidan erabaki zen kanporaketa, eta ordubeteko lehia gogorra izan zen. Hasiera orekatua izan zen (8-8) , baina hortik aurrera Miguel Perez agintzen hasi zen. Haizea alde, Mikel Rafael Ander Muguruza baino gehiago izan zen aurrean, eta aldea kendu zion (18-14). Nabarmentzekoa Mikeleksakearekin eginiko mina.

Iparralde 2

Gure Kirola 1

KADETEAK

Etxegoien-Mendi II.a 10

Garcia-Uribe 22

GAZTEAK

Mendi-Beola 22

Jimenez-Jimenez 15

NAGUSIAK

Etxeberri-Erreka 22

Lopez-Madruga 12

Larunbatean Iparraldeko seikoteak historia egin zuen. BERRIA txapelketako parte-hartzaile klasikoetako bat da, eta aurrenekoz lortu zuen lehen fasea igarotzea: etxean irabazi zuen, Donibane Lohizunen, Barakaldoko Gure Kirola kanporatuz. Nagusietako partidak erabaki zuen lehia, eta Irurtzunen aurka jokatuko du final-zortzirenetan.

Gure Kirolak indartsu hasi zuen kanporaketa, eta Garcia eta Uribe kadeteek hogeita bat minutu aski izan zituzten Etxegoien eta Mendi II.ari irabazteko. Irabazleen aurrelariak 17 tanto lortu zituen. Gazte mailako partida orekatuagoa izan zen, eta berdinketa ugari izan ziren, azkenekoa 15nakoa. Hortik aurrerakoetan, Andoni Mendi gehiago sartu zen jokoan, eta, Bixente Beolaren laguntzaz, jarraian egin zituzten azken zazpi tantoak; azkenekoa, dejada bat zabalean.

Nagusiek erabaki zuten kanporaketa, eta Etxeberri eta Erreka Iparraldeko ordezkoak Lopez eta Madruga baino gehiago izan ziren. Hasieran kendu zieten aldea (10-5), eta ondo kudeatu zuten (16-6). Etxeberri nabarmendu zen.

Intxurre 49

Lagun Onak 55

KADETEAK

Larrea-Mujika 22

Iturbe-Rekagorri 21

GAZTEAK

Artola-Murua 22

Etxebarria-Mendiolagarai 12

NAGUSIAK

Alonso-Esnaola 5

Arrese-Zabala 22

Zornotzako Lagun Onak-ek lortu zuen hirugarren txartela, tanto kopuru orokorrari esker Alegiako Intxurre kanporatu zuenean, eta Zazpi Iturri izango du hurrengo aurkari. Alegiako seikoteak etxean jokatu zuen, Intxaurreko fitxako sei pilotarirekin, eta ondo jardun zuen, baina nagusietan hamazazpi tantoz galdu izana zama handia izan zen.

Etxekoek lehen bi partidak irabazi zituzten. Aurrenekoa izan zen estuena; Alegiakoek buelta eman zioten aurkako 13-18koari. 21nako berdinketarekin, Eñaut Larrearen dejadak erabaki zuen lehia. Gazteetan, Intxaurreko Artola eta Muruak hasieratik agindu zuten, eta aurrelaria nabarmendu zen, saketik hamar tanto lortuz. Azken partidan, Intxaurrek 11 tanto aski zituen aurrera egiteko—talde batek lehen bi partidak irabazten baditu, tanto kopuruak erabakitzen du kanporaketa—, baina Imanol Arresek eta TxaberZabalak ez zieten aukerarik eman etxekoei.