Ertzainek ukabilkada eman diote Argazki Presseko argazkilari bati

Athleticeko zaleak jokalariekin batera San Mamesera bidean zirela, zaleetako batzuek bengalak piztu zituzten, eta berehala agertu ziren ertzainak. Jon Hernaez Argazki Presseko argazkilaria lanean ari zen une horretan, BERRIArentzat argazkiak ateratzen, eta une batean ertzainetako batek buelta eman eta ukabilkada eman zion. Kamera eta argazkilaria bera lurrera erori ziren, eta kazetarien kreditazioa erakutsitakoan, alde egin zuten ertzainek. Argazki Pressek salaketa jarriko du, ondoko argazkia froga gisa baliatuta.