ESAITek berriro kritikatu du EAEko Futbol Federazioaren jarrera, selekzioaren ofizialtasunaren bidean "aitzakiak jartzen dituelako beti", eta gizarteari gaurko egoera politikoa baliatuta "ofizialtasunaren alde borrokatzeko" dei egin dio.
Zenbait proposamen zehazten ari da ESAIT —kirolaren eta politikaren arloetan ez ezik, alor juridikoan ere bai—, baina gaur Bilbon emandako prentsaurrekoan adierazi du hurrena jakinaraziko dituela xehetasunak.
Hilaren 28an izango da gizonezko futbolarien Euskal Selekzioaren gabonetako lagunarteko partida, Bilbon Tunisiaren aurka, eta selekzioaren aldeko aipatutako taldeak egun osoan Areatzan ekitaldiak egiteko asmoa du —Bilboko Udalaren baimenaren zain da—.
Sarrerak salgai, bihartik aurrera
Bihartik aurrera erosi ahal izango dira Euskal Selekzioa-Tunisiarako sarrerak, BBKren kutxazainetan eta Gipuzkoako eta Arabako federazioetan, hilaren 25era artean. 26tik aitzina San Mames estadioko txarteldegietan egongo dira sarrerak —10:30-13:00, 17:30-20:00—.
Jose Mari Amorrortu hautatzaile berriak abenduaren 22an emango du deialdia.
