Eskoziak deus ez galtzeko, eta bere jokoa egingo du

Irudiz, final-laurdenetako kanporaketarik errazena da nork irabaz dezakeen asmatzeko. Australia da egungo txapelduna, eta 1995ean ere Wallabiesek irabazi zuten. Azken Hiru Nazioetako Torneoan, hala ere, ahulezia erakutsi zuen, eta kolpatu ugarirekin jardun du azkenaldian. Kopa honetan emaitza ikusgarriak lortu ditu, baina bere ahulezia ere erakutsi zuen Irlandaren aurka, soilik puntu bateko aldeaz irabazita. Irlandak bere jokorik onena erakutsi zuen, eta eskura ukan zuen garaipena.

Kontuan hartuta, Irlandak ez zuela arazorik ukan Eskozia menderatzeko azken Sei Nazioetako Torneoan, pentsatzekoa da Australiak ez lukeela arazorik ukan behar. Australiarrak indartsuak dira aitzin-multzoan, baina kontrarioak sutsu jokatzen badio, ez da gustura aritzen. Gibelean, azken orduko aldaketak egin ditu Eddie Jones entrenatzaileak.

Redpath eskoziarrak bihar amai dezake bere jarduna

Hala, Burkeren ordez Mortlock jokalari haustailea jarri du. Roffen ordez, berriz, Tuqiri jarriko du hegalean, hamahiruko errugbian aritua. «Erabaki zaila hartu behar izan dut, eta hastapenetik ariko ez bada ere, Roff erabakigarria gerta daiteke edozein unetan sartuta ere.

Eskoziari dagokionez, Brian Redpath eskoziarrak nazioarteko azken partida joka dezake. Uztartze erdiak aitortu du baldintza guztiak beren «kontra» dituztela. «Erronka latza dugu, baina uste dut hobe dezakegula gure joko-maila. Horretarako gure jokoa inposatu behar dugu. bestalde, ez dut uste konformatu behar dugunik beren hutsak eta faltak baliatzearekin; gure esku dugun guztia egin behar dugu, hori izan baita azken lau partidetan egin ez duguna».

Oso dinamikoak izan beharko dute eskoziarrek. Frantziaren kontra gaizki jokatu zuten, baina Fijiren kontra hobekuntza ukan zuten. Hala ere, bi puntuz irabazi zuten zoilik. Redpathek hirugarren Mundiala jokatuko du.