Unipublic enpresak, hau da, txirrindularitza probaren eskubideen jabeak kendu du Abraham Olano Espainiako Itzuliko zuzendari kargutik.
Frantziako Senatuaren ikerketak 1998ko Tourrean ustez EPO kontsumitu zuten hainbat txirrindulariren izenak argitaratu ditu: urte hartan Parisko podiuma osatu zuten hirurak, Marco Pantani, Jan Ulrich eta Bobby Julich; Erik Zabel, Mario Cipollini eta Abraham Olano bera, besteak beste.
Hala ere, Olano kargutik kentzeko arrazoiak emateko garaian, zuzendaritzak gisa honetako albisteek eragiten duten “sentsibilitatea” nabarmendu dute. Izan ere, Unipublicek ohar bidez jakinarazi duenez, erabakiak “ez du aurretik juzgatzen, informazio hauen harira, Olanoren jarrera edo erantzukizuna”. “Olanok egoera hau ahalik eta bizkorrena konpontzea espero eta nahi dugu”, gaineratu dute oharrean.
