Eztabaida ez da berria. Izan ere, erabakitzeko eskubidearen inguruko aldarriak aspaldi heldu ziren kirol mundura. Hala ere, gaiak zeresan ugari ematen du oraindik ere. Txapelketa asko jokatzen dira Euskal Herrian Espainiako Kirol Federazioak antolatuta. 2011n, esaterako, Bilbo eta Gasteiztik igaro zen Espainiako Itzulia. Orain gutxi, berriz, Zumaian jokatu da Espainiako Kopa.
Arkaitz Irureta blogariaren Zumaya Flisch Tail, Copa de España artikuluak piztu du oraingoan eztabaida. Bertan gogorarazi du Euskal Herriko lasterkariei euskal selekzioan parte hartzea debekatu izan zaiela, eta ohartarazi du halako txapelketek "atzeraka" eginarazten dutela berezko selekzio baten aldeko borrokan. Horiek hala, boikoterako deia egiten die euskal kirolariei.
ESAITek argi du nolakoa behar lukeen jokalekuak. Haren iritziz, "aniztasunaren aurkakoa, erabat asimetrikoa" da egungo egoera. "Jokaleku perfektua norberak askatasunez nahi duen jarduera garatzeko eskubidea errespetatzen denekoa da. Baina bada nortasun bat aitortua ez dena, euskal herritarrarena". Hala dio BERRIAren Ibilkari blogean jarritako oharrean.
Zalantzak dituztenak ere badira, hala ere. Josu Uriarte txirrindulari eta triatletak, esaterako, horrek kirolariengan izan ditzakeen ondorioez ohartarazi du. "Korrikalaria ikusten dut galtzaile; gehienak askorik ez, baina profesionala izan barik elitean daudenak bai, eta Euskal Herrian badira batzuk".
Xabi Mujika mendizaleak, berriz, askatasunaren aldeko hautua egiten du. Hark euskal selekzioaren aldekotzat jotzen du bere burua, baina nabarmendu du bakoitzak libre beharko lukeela zer egin nahi duen erabakitzeko.
