Euskal Herriko elastikoarekin parte hartzen ari diren euskal atletek ez dute inongo oztoporik izan Beteranoen Europako Atletismo Txapelketan. Halaxe baieztu du Mikel Odriozolak, Gipuzkoako Atletismo Federazioko lehendakari eta txapelketako antolatzaileetako batek. Euskal Herriko elastikoa soinean daraman atleta kaleratu egingo zutela adierazi zuen Europako Federazioak hasiera batean. Hortaz, ezinegona zen nagusi hainbat atleten artean. Ordea, momentuz arazorik ez dela izan adierazi dute antolatzaileek.
Gipuzkoako Foru Aldundiak eta Donostiako Udalak atzo egin zuten txapelketarako propio diseinaturiko elastikoaren aurkezpena. Euskal atleta guztiak gonbidatu zituzten, eta 30 inguru azaldu ziren —doan jaso zituzten elastikoak—. Atleta guztiei garbi utzi zieten hasieratik kaleratu egingo dituztela Euskal Herriko elastikoarekin lehiatuz gero. Izan ere, araudiak zera dio, atleta bakoitzak izena emanda dagoen selekzioaren arroparekin lehiatu beharko duela. Alegia, Ipar Euskal Herriko ordezkariek Frantziako elastikoa jantzi beharko dute, eta Hego Euskal Herrikoek, Espainiako selekzioarena. Hori jakin arren, euskal atleta batzuk Euskal Herriko elastikoarekin plazaratu dira, eta guztia normaltasun osoz joan da. Ikusi egin beharko da datozen egunetan nolako jarrera hartzen duten epaileek.
Txapelketari erreferentzia eginez, euskal selekzioen ofizialtasuna aldarrikatu du ESAITek —euskal selekzioen aldeko iritzi taldeak—. Atleta bakoitzak "nahi duen eta sentitzen duen" elastikoarekin lehiatzeko eskubidea duela adierazi du.
