Aldatu, Nibali hiru asteko itzulirik irabazi gabe zegoelako -Italiako Giroan hirugarren izan da aurten-, eta Mosquera eta Peter Velits (Columbia) hiru asteko itzuli bateko podiumera igo gabe zeudelako. Hiru horiek freskatu dute 2010eko Vueltako podiuma; lehen hamahiru etapak aztertuta, Igor Antonek (Euskaltel-Euskadi) egon beharko zukeen podiumean. Berak irabazi zuen laugarren etapa, Valdepeñas de Jaenen amaitu zena, eta Xorret de Catin jantzi zuen liderraren maillota, zortzigarren etapan. Bost egunez ibili da Anton maillot gorria jantzita, baina aurkariek egin ezin izan zutena egin zuen errepideak. Peña Cabargara bidean erori, eta erretiratu egin behar izan zuen, ukondoa hautsita.
Ordurako beste hiru etapa irabazita zeuden euskal txirrindulariak. David Lopezek (Caisse d'Epargne) irabazi zuen bederatzigarren etapa, Alcoin; Imanol Erbiti taldekideak hamargarrena, Vilanova i la Geltrun; eta Igor Antonek berak 11.a, Andorran. Lehen 11 etapetan, lau garaipen. Eta beste bat falta zen; ikusgarriena, agian. Euskaltel-Euskadik, eta Mikel Nievek bereziki, etapa gogoangarria egin zuten Cotobellora bidean, Vueltako etapa nagusian, eta leitzarrak profesionaletako lehen etapa irabazi zuen. Bost etapa garaipen, Anton bost egunez liderraren maillotarekin, Nieve 12. postuan sailkapen nagusian... Euskal txirrindularien maila ere aldatu egin da aurtengo Vueltan, azken urteotan ez dutelako halako distirarik egin.
Joaquim Rodriguezen ezina
Antonen erorikoak nabarmen baldintzatu zuen Vueltako oilarren arteko dema. Ordura arte lider sendoaren itxura ematen ari zen Euskaltel-Euskadikoa, eta ordutik aurrera Liquigasek hartu behar izan zuen ardura hori. Peña Cabargan jantzi zuen maillot gorria italiarrak, 14. etapan -Joaquim Rodriguezek (Katuxa) irabazi zuen etapa-, eta bi egun geroago soilik egin zuen irrist, Cotobellon gora. Rodriguez iritsi zen lider gisa bigarren atseden egunera, baina kataluniarrak huts nabarmena egin zuen Peñafieleko 46 kilometroko erlojupekoan. Peter Velitsekiko sei minututik gora galduta, han galdu zituen maillot gorria eta podiuma. Hori bai, UCI Pro Tourren sailkapenean buruan jarri zen atzo.
25 urte dauzka Nibalik, eta beste hainbeste Velitsek. Gaztetasunaren kolpea izan da biena. «Nire kirol ibilbidean etengabe hazten joan naiz, handinahia naiz, lasterketa handiak irabazi nahi ditut. Ez dakit Contador eta Schlecki irabazteko gai izango naizen, baina saiatuko naiz». Garaipenarekin, Vueltatik Tourrerako jauzia eman du Nibalik. 34 urterekin, berriz, ametsa bete du Mosquerak. Etapa bat eta podiuma. Biak zeuzkan begiz jota, eta biak lortu ditu. Saiatu izanaren saria jaso du galiziarrak.
Sailkapena
NAGUSIA1. Vincenzo Nibali (Liquigas) 87.18.33
2. Ezequiel Mosquera (Xacobeo) 41era
3. Peter Velits (Columbia) 3.02ra
4. Joaquim Rodriguez (Katuxa) 4.20ra
5. Frank Schleck (Saxo Bank) 4.43ra
6. Xavier Tondo (Cervelo) 4.52ra
7. Nicolas Roche (Ag2r) 5.03ra
8. Carlos Sastre (Cervelo) 6.06ra
9. Thomas Danielson (Garmin) 6.16ra
10. Luis Leon Sanchez (Caisse) 7.42ra
11. David Garcia (Xacobeo) 9.37ra
12. Mikel Nieve (Euskaltel) 10.58ra
13. Vladimir Karpets (Katuxa) 13.05era
14. David Moncoutie (Cofidis) 14.32ra
15. Christophe Le Mevel (Franc.) 16.36ra
12. Mikel Nieve (Euskaltel) 10.42ra
31. Amets Txurruka (Eusk.) 48.10era
42. David Lopez (Caisse) 1.25.08ra
46. Juanma Garate (Rabob.) 1.35.36ra
56. Juanjo Oroz (Eusk.) 1.47.25era
78. Imanol Erbiti (Caisse) 2.13.50era
84. Gorka Verdugo (Eusk.) 2.21.50era
101. Pablo Urtasun (Eusk.) 2.49.40ra
110. Pierre Cazaux (Franc.) 3.12.17ra
115. T. Garcia Acosta (Caisse) 3.18.31ra
141. K. Fdz. de Larrea (Eusk.) 3.53.17ra
