Datorren igandea egun handia izango da realzaleentzat. Emakumezkoen taldeak Espainiako Superkopako finala jokatuko du eguerdian, Salamancan (Espainia), eta, partida Donostiatik ikusteko, festa berezi bat antolatu du klubak. Anoeta estadioan elkartu nahi dituzte zaleak, eta partida zuzenean emango dute, barruan eta kanpoan; bukatzen denerako, gizonezkoen taldeak jokatuko du han, Athleticen aurka (14:00).
Gaur erabakiko da Realak zer talderen aurka jokatuko duen finala: Atletico Madril eta Bartzelona 20:00etan ariko dira elkarren aurka.
Iaz, taldeak Espainiako Kopa irabazi zuenean, Donostiako Trinitate plazan antolatu zuten festa. Klubaren esanetan, orduko giro berezia sortu nahi dute aurten ere. 11:45ean hasiko da festa, orduan irekiko baitituzte Anoetako beheko eraztuneko ateak eta tabernak zaleentzat. Finala zuzenean emango dute tabernetako telebistetan, zelaiko bideomarkagailuetan eta Anoeta kanpoan jarriko duten hamabi metro koadroko pantailan. Euskotren geltokiaren parean egongo da.
13:00etatik aurrera, «Espainiako Ligarekiko kontratuko konpromisoengatik», bideomarkagailuetako pantailak erdibituko dituzte, Superkopako finala eta Anoetako derbia emateko aldi berean.
