FUTBOLA. ESPAINIAKO LIGA. Bartzelona da Ligako txapeldun berria

Bartzelonak bere historiako 17. Espainiako Liga irabazi zuen atzo, txapelketa amaitzeko bi jardunaldiren faltan, Levanteren aurka bana berdindu ostean. Kataluniarrek dezente sufritu zuten Ciutat de Valencia zelaian, baina Eto´ok partidako 59. minutuan lortutako golari esker, sei urte irauten zuen titulo lehorteari amaiera eman zioten.

Real Madrilek ere Sevillan jokatu zuen atzo. Luxemburgorenak ez ziren Sanchez Pizjuan zelaian jokatutako lehia irabazteko gai izan (2-2), eta horregatik berdinketa nahikoa zitzaien Rijkaardenei, Liga irabazteko. Levante, baina, larri dabil. Jaitsiera postuetan dagoen Mallorca hiru puntutara zuen, atzoko neurketa hasi baino lehenago. Hori dela eta, hil ala bizi irten ziren; haustera. Ez, ordea, Bartzelona. Ligaz jabetzeko berdinketa nahikoa zela jakinda, arriskatu gabe jardun zuten Ronaldinho eta enparauek. 34. minutuan merezitako saria lortu zuen Levantek, Riveraren bidez. Kataluniarrak ez ziren urduritu eta bigarren zatiaren ordu laurdena betetzera zihoanean, Eto´o kamerundarrak bere 24. gola sartu zuen. Azkenean, Levantekoak gustora lortutako puntuarekin eta Bartzelonakoak puztuta, Liga irabaztegatik.