Europako txapelduna zuen aurrean Athleticek, eta ez alferrik. Lehen zatian itxura txukuna erakutsi arren, zuri-gorriek ezin izan dute ezer egin Real Madrilen nagusitasunaren aurrean. Partida hasi eta berehala jarri zaie lehia maldan gora bilbotarrei, bigarren minuturako markagailuan aurreratu baitira zuriak, Cristiano Ronaldok baloia buruz sareratuta.
Lehen zatiaren hasieran lehena, eta amaieran bigarrena. Atsedenaldira joaterako aldea zabaldu dute etxekoek, Karim Benzemak korner batean buruz gola egin eta gero. Bi gol buruz, eta partida ia erabakita. Bigarren zatia hasi eta hamar minutura egin du Ronaldok bere bigarrena, Real Madrilen hirugarrena, eta hortik aurrera besoak jaitsi ditu Athleticek.
Laugarrena ere egin du Real Madrilek, 69. minutuan. Modricek pasea eman dio Ronaldori, eta hark, Iraizozekin aurrez aurre, gola oparitu dio Benzemari. Ronaldok berak hat trick-a osatu du, 88. minutuan bere hirugarrena eta Madrilen bosgarrena eginda.
Bigarren mailara jaisteko postuetan da orain Athletic; 17.a da sailkapenean, lau puntu bilduta. Celta hartuko du etxean hurrengo jardunaldian.
