Gauzak ez dira aldatu

Etena bai, baina aldaketarik ez du izan ABF ligak. Itxako eta Bera Bera sailkapenaren goiko muturrean zirela iritsi ziren neguko etenaldira —azaroaren 15etik ez da jardunaldirik izan—, eta, atzoko garaipenei esker, toki berean jarraitzen dute orain ere. Kukullagak, berriz, nahi eta ezinean hartu zituen oporrak, eta bizkaitarrak hala ibili ziren atzo ere, Eldari aurre egin ezinik. 35-17 irabazi zion Itxakok Ro'Casari, 36-20 Bera Berak Alcobendasi, eta 23-32 galdu zuen Kukullagak Eldaren aurka.

Munduko Txapelketaren ondoren, jokalariak berriz ere elkarrekin jokatzen ikusteko aukera izan zuten atzo Itxakoko zaleek. Ezaugarri hori tarteko, arriskutsua izan zitekeen partida, jokalari guztiek elkarrekin entrenatzeko aukera gehiegi ere ez dutelako izan. Baina, ohi duten moduan, hastearekin batera hautsi zuten partida nafarrek. 12. minuturako 6-2 ziren aurretik etxekoak, eta 20. minutua betetzerako 10-4. Soproni fitxatu berriak ere eduki zuen jokatzeko aukera, eta berea izan zen 13-6koa. 17-7 iritsi ziren atsedenaldira, eta bigarren zatian ere intentsitate handiz jokatu zuten etxekoek. Azkenerako hemezortzi goleko aldea lortu zuten nafarrek: 35-17. Atzoko bi puntuei esker, lehen postuan jarraitzen du Itxakok.

Berak Berak ere ez zuen hutsik egin Alcobendasen aurka, baina gogotik lan egin behar izan zuten donostiarrek, lehen zatian bereziki. Horren erakusgarri, espainiarrak 8-9 aurretik ziren 16. minutuan, eta 12-13 ere bai 25.ean. 16-14 amaitu zen lehen zatia, eta partida erabat aldatu zen bigarrenean. Bera Berak defentsako lan ona egin zuen, eta kontraerasoan hautsi zuen partida. 20-11ko partzialari esker, 36-25 nagusitu ziren azkenean etxekoak. Mar Saguntek ere irabazi egin zuen atzo Mar Alacanten pistan (23-24), eta hirugarren jarraitzen dute donostiarrek.

Kukullagak, berriz, zulotik irten ezinda jarraitzen du. Elda nabarmen hobea izan zen atzo, eta 23-32 galdu zuten bizkaitarrek.