Espainiako Auzitegi Nazionaleko 3. Zigor Aretoak onartu egin du fiskaltzak, Voxek eta Manos Limpias elkarteak aurkeztutako helegitea. Andreu epaileak auzia artxibatu zuen, baina auzitegiak orain agindu dio auzia iker dezala, txistualdian deliturik egin ote zen argitzeko.
Maiatzaren 30ean jokatu zuten Athleticek eta Bartzelonak kopako finala, Kataluniako hiriburuan. Txistuekin hartu zuten ikusleek Espainiako ereserkia. Andreu epaileak, artxibatzeko arrazoien artean, aipatu zuen 2009ko finalean ere izan zirela txistuak eta orduan ere auzia artxibatu zela.
Auzitegi Nazionalak, ordea, argudiatu du 2009an eta 2015ean Katalunian "independentziarekiko giro instituzionala oso ezberdina" dela eta ezin direla onartu Espainiako ereserkiarekiko eta estatuburuarekiko "irainak".
