Igor Gonzalez de Galdeano Euskaltel-Euskadiko managerrak irmo defendatu du proiektu berria. World Tourrean jarraitzea da taldearen helburua. "Eta helburu hori lortzeko fitxatu ditugu atzerritarrak. Filosofia ez da aldatu". Proiektuaren oinarrian "euskal txirrindulariek" jarraitzen dutela azpimarratu du gasteiztarrak. "Euskaltel-Euskadi indartsu bat osatzea da fitxaketen helburua, eta klasikoetan eta esprintetan geneukan hutsunea betetzea".
Etorkizun batean "etxeko txirrindulari gehiago" dauzkan proiektua egiten saiatuko direla argitu du managerrak. "Baina talde irabazlea behar dugu horretarako". Aste honetan albisteren bat egon daitekeen arren, azaroaren 1era arteko epea dauka Txirrindularitzaren Nazioarteko Batasunak (UCI) World Tourreko 15 taldeen izenak emateko. "Ondo lan egin dugu, UCIren eskaeretara moldatu gara, eta World Tourrean egongo garela uste dut", ondorioztatu du Gonzalez de Galdeanok.
