Hernanik eta Huartek jokatuko dute aurtengo finala

Huarte eta Hernani izango dira aurrez aurre Berria txapelketako finalean. Hernaniko pilotalekuan izango da hitzordua, larunbatean, arratsaldeko 17:00etan. Hernanik nagusitasunez kanporatu zuen Lemoa finalerdietan, jokatutako hiru partidak irabazita. Huartek, berriz, gehiago sufritu behar izan zuen Umore Ona bidean uzteko. Bi partida galdu zituen eta bost tanto eskasengatik eskuratu zuen final handirako txartela.



HUARTE 51; UMORE ONA 46

Kadeteak: Garralda-Beroiz 22; Narbarte-Madariaga 2.

Gazteak: Ioldi-Linzoain 12; Apezetxea-Eskudero 22;

Nagusiak: Errea-Tabar 17; Loiarte-Retegi 22.

Ustekabeko gutxi egon zen Urnietako pilotalekuan jokatutako finalerdietako lehen partidan. Garraldak eta Beroizek ez zieten inolako aukerarik eman Narbarte eta Madariagari, eta berriro erakutsi zuten kadete mailako pilotari onenak direla. Bigarren partidan ustekabekoa izan zen. Lehia parekatua espero zen, baina ez zen horrelakorik egon. Apezetxea izan zen horren errudun nagusia, aurrelari goizuetarrak erakustaldia eman baitzuen. Eskuderok ere ondo lagundu zion atzeko koadroetan. Azkenean, 22-12 nagusitu zen Umore Onako bikotea.

Azken partida erabakigarria ikusgarria izan zen. Goizuetarrak kanporaketari buelta ematekotan izan ziren. 15-9 izan ziren aurretik, baina ez zuten lortu aurkaria txikitzen. Pilota aldaketa batek ere izan zuen eragina azken emaitzan, horrekin Huartek ondo eutsi baitzion aldeari.



HERNANI 66; LEMOA 39

Kadeteak: Lizarralde-Grajal 22; Arrese-Gojenola 12.
Gazteak: Ezeiza-Gorrotxategi 22; Galarza-Saenz 10.
Nagusiak: Alvarez-Mendizabal 22; Erauskin anaiak 17.
Altzan jokatutako beste finalerdian ez zen kolorerik izan. Hernaniko pilotariak goitik behera nagusitu ziren. Lehen partidan hamar tantoko aldea lortu zuten, eta bigarrenean hamabikoa. Hala, azken partida jokatu aurretik hernaniarrek patrikan zuten finalerako txartela. Hernani sasoiko dago oraindik. Partida bakarra galdu du, eta larunbatean aukera bikaina du orain arte eginiko lan bikaina biribiltzeko. Etxean jokatuko du, gainera.