Hiru segundora murriztu da aldea

Ez sinesteko moduan dago Espainiako Vuelta. Hemezortzi etapa jokatuta, hiru segundoko tartea dago Vincenzo Nibali liderraren (Astana) eta Chris Horner (RadioShack) bigarren sailkatuaren artean. Etapa garaipena lortzeko borroka eta sailkapen nagusia mutur banatan jarri ditu Burgos eta Peña Cabarga arteko etapak. Ihesaldian sartuta, garaipen ederra lortu du Vasil Kiryienkak (Sky), iheskide guztiak atzean utzi eta atzeragotik etor zitekeenari begiratu ere egin gabe. Atzean, berriz, Movistarrek eta RadioShackek erritmo bizi-bizia jarri dute etapa guztian zehar, eta helmugara iristeko pare bat kilometro falta zirela lortu dute Nibali liderra itotzea. Dani Morenok eta Joaquim Rodriguezek (Katuxa) jo dute lehen eraso serioa, eta Valverde bera geratu da ezinean hasieran. Baina Hornerren mugimenduarekin, erabat lehertu da liderra, eta gorriak ikusi ditu sailkapen nagusiko aldeari eusteko. Estatubatuarrarekiko 25 segundo galdu ditu azkenean, eta 28ko altxorra zeukan. Narancoko igoera eta Angliru zain daudela, ikusgarri geratu da Vuelta.