Hondorik ez duen zuloa

Toulon. Lewis-Roberts, Bruno (Orioli, 70. min.), Kubriashvili (Hayman, 55. min.); Shaw (Botha, 51. min.), Samson; Gunther (El Abd, 76. min.), Armitage, Van Niekerk; Tillous-Borde, Willkinson (Cibray, 79. min.); Palisson, Giteau (Messina, 53. min.), Bastareaud, Lapeyre; eta Rooney.

Baiona. Iginiz (Manukula, 65. min.), Roumieu (Da Ros, 61. min.), Boyoud (Tialata, 65. min.); Chisholm, Boutaty; Haare (Lauaki, 64. min.), Baget, Puricelli (Bernad, 49. min.); Philipps (Gartzia, 65. min.), Boyet; O'Connor (Lacroix, 54. min.), Mazars, Gerber, Huget; eta Heymans.

Markagailua. 3-0, 3-3, 6-3, 9-3, 12-3, 15-3 (atsedenaldian); 22-3, 22-10, 29-10, 36-10, 43-10 eta 50-10.

Epailea. Sebastien Cloute. Txartel gorria atera zion Hugeti (30. min).

Oraingoan, bai; ikusi beharrekoa ikusteko prest zeuden denak. Egiazko abiada hartuko zuela sinetsita zegoen Baiona. Hitz anitz entzun dira aste honetan, Toulonen aurkako partidaren aitzinetik. Jokalariak zaleekin bildu ziren, mea culpa esan eta izerdia eta odola zin egiteko. Hitzez jositako saio ugari; hitz potolo anitz. Baina hitzak bakarrik.

Ikusiko zela, ikusiko zela... Eta, beste behin, Baiona petral eta ezinean ikusi ahal izan zen atzo. Yoann Hugeti txartel gorria atera zioten 30. minutuan, eta, horren ondoren, Touloneko RCT nagusitu zen erabat. Egia da epaileak ez ziola Baionari inolako mesederik egin txartel gorria aterata; hamabost hamabosten aurka aritu ziren borrokan, baina, orduan, txartel horia erakutsi zioten Touloneko Bastareaudi, eta, Baionako Hugeti, berriz, gorria.

Harritzekoa izan zen epaileak falta berberarengatik zigor desberdinak jartzea —denak ari ziren borrokan—. Dudarik gabe, partida baldintzatu zuen txartelak, ordura arte Toulon 12-3 bakarrik zegoelako aitzinean. Baiona larri zebilenez hamabost jokalarirekin, jokalari bat gutxiagorekin are larriago ibili zen.

Dena den, Aturri eta Errobikoek gisa horretan hondoa jo izana azaltzeko ez da aski txartel gorri hori. Txartelak txartel, sasoia hasi zenetik dituen gabeziak antzeman zitzaizkion Baionari, beste behin ere. Ezinezkoa da maila horretan hainbeste falta egitea. Zigor kolpeak bata bestearen gibeletik pilatuz, baloia Touloni eman zion behin eta berriz. Wilkinsonek erakustaldia eman zuen, hamar ostikotik hamar asmatuta. Toulonekoek ederki baliatu zuten baloia, orotara bost entsegu sartu baitzituzten.

Sailkapeneko azken postuan

Partida maldan gora jarri zenean, baionarrek burua jaitsi zuten, eta azkenean 50-10 galdu zuten. Emaitza gogorra oso. Denek azpimarratuko dute lehen zatian hobekuntza ugari egin zituela Baionak, uztartzean batik bat. Chisholmen itzulerak on egin zion, dudarik gabe.

Baina Baiona kezkatzeko moduko letargian dago. Atzo, gibeleko lerroak ez zuen taxuzko jokaldi bat bera ere egin. Ezintasun hori ohitura bihurtzen ari da. Jokalariek hitzemandako oldartze hura ez zen etorri. Beste behin, lo egon ziren. Esnatzeko ordua dute. Azken postuan daude jada baionarrak. Miarritze puntu batera dute. Aitzinean, zuloa egiten ari da. Zuloak ez dauka hondorik.