Balekoa zen partida amaitu berritan, eta balekoa da biharamunean ere. Hiru puntuak ez eskuratu izanaren penarekin, baina baikor eta gustura esnatu dira Athleticeko jokalariak. Oso partida serioa jokatu zuten ukrainarrek, arriskurik handiena eurek sortu zuten, eta atzealdean, behintzat, lan serioa egin zuten bilbotarrek. 0-0ekoarekin, sailkapenean bigarren daude zuri-gorriak, puntu batekin. Hiru ditu Portok —6-0 irabazi zion Bate Borisovi—, bat Xakhtarrek, eta batere ez Batek.
Txapeldunen Liga alboratuta, Espainiako Ligari begiratzeko garaia da orain, etzi jokatuko duelako Athleticek laugarren jardunaldiko partida, San Mamesen, Granadaren aurka (18:00). Partida horretarako ez dira osatuko Ager Aketxe eta Ibai Gomez. Aketxek haustura dauka eskuin oineko bigarren behatzean, eta jokatu ezinik egongo da aste batzuetan. Ibaik, berriz, gainkarga dauka eskuin hankako gihar iskiotibialean, eta atseden hartu beharko du. Ondo bidean, ezker hegalera itzuliko da Muniain, eta Susaeta ariko da eskuinetik.
