Illunbeko Lagun Arok bakarrik irabaz dezake Menorcan

Nongo Lagun Aro ikusiko da gaur Menorcan? Fuenlabradan ezinean aritu zena, edo pasa den igandean Ilunben zaleak asebete zituen talde grinatsua? Donostiakoa izan behar, Menorcan garaipena lortzekotan bada. Menorca plaza gaiztoa da, Manresa eta Kanaria Handikoarekin batera, ligako zailenetakoa. Zaleak gain-gainean daude, eta hori eramaten jakin egin behar da. Etxeko taldea markagailuan aurretik denean, batez ere.

Pablo Lasok Fuenlabradan jokatu zuen Lagun Arok gauza batzuk ondo egin zituela gogoratu du, dena ez zela txarra izan. Are gehiago, «gauza on horiei esker» bilatu zuten Cajasol menderatzeko bidea. Fuenlabradan, ordea, galtzeaz gain, itxura kaskarra eman zuen taldeak, eta astebete atzera, etxean, Cajasolen aurka, oso ona. Defentsan estutzen, eta erasoan baliabide asko erabiliz. Antzekoa egiten saiatu baina bide hoberik ez, bigarren garaipena lortzen saiatzeko.

Lan zaila izango da. Lau partida jokatu ditu Lagun Arok Menorcan (Herrialde Katalanak), eta denak galdu. Balear Uharteko saskibaloi taldeak etxeko indarra du bere indarraren ardatz. Han lortu nahi dituzte jaitsiera saihesteko helburuan lagunduko duen garaipen kopurua, zortzi edo bederatzi garaipen, alegia. Lagun Aroren aurkakoa funtsezkotzat jotzen dute, etorkizunean gipuzkoarrak aurkari zuzen izan daitezkeelakoan. Ondo ekin zioten ligari, Valladolid aise menderatuz etxean. Bigarren jardunaldian ere ondo aritu ziren Badalonan, partidako hondarrean izan ezik.

Lasoren ahotan, «talde arriskutsua» da Menorca, LEB ligako bizkarrezurra mantendu duelako. Ciorciarik, Cuthbert Victorrek, Diego Sanchezek eta Urko Otegik jarraitzen dute, eta Limonad eta Jakim Donaldsonen moduko fitxaketa interesgarriak egin dituzte. Paco Olmos entrenatzaileak ere denbora darama han, eta garrantzitsua da hori.

MENORCA-LAGUN ARO GBC

Txapelketa. ACB ligako hirugarren jardunaldia.

Menorca basquet. Ciorciari, Servera, Faner, Huertas, Limonad, Diego Sanchez, Cuthbert Victor, Otegi, Radenovic, Jakim Donaldson, Molina eta Caio Torres.

Lagun Aro GBC. Uriz, Salgado, Baron, Lasa, Alfonso Sanchez, Lorbek, Panko, Tsikitixvili, Miralles, Doblas eta Kone.

Sailkapena. Lagun Aro 9. postuan dago: 1-1 (+ 6); Menorca, balantze berarekin, 11. da (-6).

Lekua. Pavello Menorca (5.325 ikusle).

Ordua. 12:30 (ETB 1).