Jokin Aperribai: «Ezin da errepikatu Mallorcan gertatutakoa»

Mallorcan gertatutakoari bueltaka jarraitzen dute Realean, azalpenik aurkituko ez baliote bezala. Espainiako Kopatik kanpo gelditu eta gero, Jokin Aperribai Realeko presidentea izan da ordukoari buruz hitz egiten azkena. Egoerari lehenbailehen buelta emateko deia egin zien jokalariei atzo, Zubietan. Bertan izan zen eurekin aurrez aurre hitz egiten: «Eurekin hitz egin nahi nuen, Gipuzkoak partida nola bizi izan zuen adierazteko. Taldea zorretan dago zale guztiekin». Presidentearen arabera, jokalariek beste itxura bat eman behar dute zelaian: «Pasa den asteartekoa ezin da berriz gertatu».

Kopatik kanporatuta, ligari begira jarri dira txuri-urdinak. Denboran urrutira joan gabe, bihar bertan Valentzia indartsuaren etxean ariko dira, gaueko hamarretan. Taldea sailkapeneko 16. postuan dago, jaitsiera postuetatik bi puntura soilik. Horren jakitun da Aperribai ere. Haren esanetan, ezin dute jarraitu Mallorcaren aurka egin behar zutenaz eta egin ez zutenaz pentsatzen. «Zenbat eta denbora gehiago pasa gertatutakoaz pentsatzen, okerrago izango da. Jaitsiera postuetatik bi puntura gaude, eta dugun egoeraren jabe izan behar dugu». Zaleak goxatzen hasteko lehen aukera izango dute bihar, Valentzian. Hurrengo bi jardunaldietan, berriz, etxean jokatuko du Realak, Atletico Madril eta Sportingen aurka. «Sufritzeko ez den beste zerbaitetarako gai garela erakutsi behar die taldeak zaleei».

Elustondo, min hartuta

Gorka Elustondok orkatilan mindu. Dena den, ez dirudi biharko partidan jokatzeko arazorik izango duenik. Azken egunetan bakarka aritu da Zubietako gimnasioan, taldetik aparte.

Bestalde, liga hasieran jokalarien grebaren ondorioz jokatu gabe geratu zen jardunaldiko ordutegien berri eman dute. Hilaren 21ean Reala Atletico Madrilen aurka ariko da, 20:00etan, Anoetan; Osasuna Valentziaren etxean ariko da hilaren 22an, 12:00etan; Real Madril eta Athleticen artekoa, berriz, 21:00etan jokatuko da, Santiago Bernabeun.