Maiatzaren 30ean, Kataluniako hiriburuan jokatuko dute azkenean Athleticek eta Bartzelonak Espainiako Kopako finala; Camp Noun, hain zuzen. Bilera egin dute bi klubetako ordezkariek federazioarekin, baina ados jarri ez, eta Espainiako Futbol Federazioko zuzendaritzak aukeratu du zelaia.
Tirabira izan da finala jokatzeko lekuaren inguruan. Santiago Bernabeun jokatzeko eskatu zuten batera Athleticek eta Bartzelonak, baina Real Madrilek uko egin zion aukera horri. Beste aukera batzuk ere izan dira mahai gainean; Sevillako Benito Villamarin, Valentziako Mestalla, San Mames bera... baina azkenean Bartzelonaren alde egin dute.
