Korrikalari festa handia izango da igandean Behobia eta Donostia artean

Urteroko kontua bihurtu da jada, baina aurten ere markak hautsiko ditu datorren igandeko Behobia-Donostia lasterketak. 20.481 korrikalarik eman dute izena, iaz baino 2.000 gehiagok, eta horietatik 3.200 eskas izango dira emakumezkoak (%15,5). Berrikuntzen bila hasita, aurten, lehen aldiz, 125 patinatzailek ere parte hartuko dute. 10:20an hasiko da proba; ezintasunen bat duten atletak irtengo dira ordu horretan, eta hamar irteera gehiago izango dira gero, azkena 11:34an. Lehen aldiz, irteera bikoitza izango dute dortsal berde eta gorridunek.

Edaria hartzeko hainbat gune izango dira lasterketan zehar; irteeran eta helmugan guneak egongo dira, eta baita 6., 9., 12., 13,5., 15. eta 18. kilometroan ere. Osasun postuak ere egongo dira 15, 18 eta 20. kilometroan.

Herri lasterketa bat da, eta 20.000 korrikalarik eta milaka ikuslek bihurtzen dute berezi lasterketa. Baina faboritoen dema ere aurkeztu zuten atzo Donostian. Chema Martinezen eta Rafa Iglesiasen arteko borroka izango da gizonezkoetan -kontuan hartzekoak dira Akebom Hadush eta Maru Gidey etiopiarrak ere-. Martinezek lau aldiz irabazi du jada Behobia-Donostia lasterketa, baina iaz Iglesiasek gozatu zuen garaipenarekin. Emakumezkoetan, berriz, Tirhas Enun eta Tigsti Gebreselassie etiopiarren arteko dema egongo da. Bi horiek Rocio Rios espainiarraren marka ontzea izango dute helburu (1.08.59). Lau atleta etiopiar horiek hilabete pasatxo daramate jada Euskal Herrian.

Behobia Txikia ere bai

Gazteenen artean korrikarako grina indartu nahian jarri zuen abian Fortunak Behobia Txikia lasterketa, eta nagusien Behobia-Donostiarekin gertatzen den moduan, Behobia Txikia ere handitzen ari da pixkanaka. 8 eta 12 urte arteko haur eta gazteek igandean izango dute aukera korrikarako dohainak erakusteko. Donostiako Bulebarrean prestatutako 600 metroko zirkuituari bi itzuli eman beharko dizkiote; beraz, 1,2 kilometro izango ditu lasterketak.