Txekiar Errepublikako korrikalari bat hil da Mont Blanceko Ultratraileko TDS lasterketan, Passeur de Pralognaneko jaitsieran, lasterketako 62. kilometroan, ibilbideko gunerik arriskutsuenean, menditik amilduta. Gauerdian gertatu da ezbeharra, 00:25ean, antolatzaileek jakinarazi dutenez. Argitaratu duten komunikatu ofizialaren arabera, istripua jazo orduko, erreskate taldeak berehala ekin dio bilaketa lanari, helikopteroz, eta nahiz eta azkar esku hartu duten, gaur goizean antolatzaileek prentsaurreko baten bidez baieztatu dute korrikalaria hil egin dela.
Gertatutako ezbeharragatik, Pralognanen zeuden korrikalariek lasterketa batzordearen agindua jaso dute buelta eman eta berriz Bourg Saint-Mauricera jaisteko. Pralognan igaro duten beste 350 parte hartzaileek aurrera jarraitu ahal izan dute. Oraingoz, 260 baino ez dira falta helmugara iristeko.
Passeur de Pralognan TDS lasterketako gunerik arriskutsu eta teknikoetako bat da. Toki horretan, korrikalariek soka batzuei heldu behar diete jaitsiera egin ahal izateko, eta zailtasun horri baldintza klimatiko txarrak, elurra eta gauaren iluntasuna gehitu behar zaizkio. Mont Blanceko Ultratraileko TDS lasterketak 145 kilometro eta 9.100 metroko desnibel positiboa du, eta lasterkariek 44 orduko muga dute bukatzeko.
