Azken urteetan San Juan Koxtape taldean arraun egindako zenbait emakumek kritika zorrotzak egin dizkiote zuzendaritzari. "Minduta" azaldu dira klubeko agintariek haiekin izan duten portaeraz, eta horren ondorioz, kluba uztea erabaki dute. Nerea Perezek, Maria Mendizabalek, Ane Arbillagak, Onintza Olaizolak, Oihana Cereijok eta Laura Goldarazenak egin dituzte salaketak.
Klubak atzo erantzun zien salaketa horiei. "Haserrea" azaldu du. "Gezur eta sasi-egiak dira, eta herrian zurrunbiloa eta nahastea eragin dute. Jakitun gara arraunlarientzat denboraldi gogorra izan dela, baina ez da samurragoa izan zuzendaritza osatzen dugun kideontzat. Ez genuke nahi horrelako beste denboraldirik, nahiz eta garaipen eta bandera asko lortu".
Horregatik, klubak jakinarazi duenez, ezohiko batzarrera deituko ditu bazkideak, azalpenak eman eta haien karguak bazkideen esku uzteko. "Lehendakaria jarri edo kentzea bazkideei bakarrik dagokie, eta haiek nahi badute, zuzendaritza berri bat egon daiteke. Horrek jarraitu nahi duten arraunlariek segitzea ahalbidetu dezake".
San Juan Koxtapeko arraunlariek bost aldiz irabazi dute Euskotren liga, eta beste bost aldiz Kontxako bandera.
