Italiako Giroak eztanda egin du Dolomitetako etapa nagusian. Hautagai nagusien zerrenda kolpetik aldatu da Corvararko bidean (210 kilometro). Steven Kruijswijk (Jumbo) da orain lider berria eta Esteban Chavesek (Orica) irabazi du etapa. Kolonbiarra dago hirugarren sailkapenean, eta Vincenzo Nibali (Astana) dago bigarren, liderrarengandik 41 segundora. Alejandro Valverde, aldiz, jokoz kanpo gelditu da. Pott egin du eta 3.06ra dago orain.
Etapa oso ikusgarria izan da. Hasieran 37 txirrindulariko multzo batek egin du aurrera, eta tarte polita lortu dute. Atzean faboritoak zeuden, eta helmugatik 27 kilometrotara jo du erasoa Nibalik, Valparolako gainean (2.200 m.) gora. Italiarrak Valverde utzi du atzean, baina ez Kruijswijk eta Chaves. Are gehiago, beste biak izan dira gero Nibali atzean utzi dutenak.
Valparolako gainean minutu erdiko aldea zuten Nibalirekiko eta aurrean oraindik ihesaldiko kide batzuk zeuden. Etapako buruan Darwin Atapuma zen (BCM). Kolonbiarrak etapa handia egin du, baina Kruijswijk eta Chavesek helmugatik bi kilometrotara harrapatu dute, Georg Preidlerrekin (Giant) batera, hura ere ihesladian sarturikoa. Esprintean Chaves izan da bizkorrena. Nibali 37 segundora helmugaratu da, eta Valverde 3 minutura. Mikel Nieve (Sky) izan da lehen euskal herritarra, 14. helmugan, 3.52ra.
