Lamont Hamiltonekin akordioa lortzear da Bizkaia

Gescrap Bizkaia taldea ixtear egon daiteke, Lamont Hamilton jokalaria fitxatzen badu. Hamilton estatubatuarra da, 28 urteko pibota, eta 2,08 metro da luzean. Azken hiru sasoietan Frantziako Paris-Levallois taldean jokatu du, eta oso batez besteko txukunak lortu ditu: 17 puntu eta zortzi errebote, partidako. Hamiltonen etorrerak Dimitrios Mavroeidisen agurrarekin edukiko luke lotura zuzena, Espainiako solobasket atarian jasotakoaren arabera. Greziarrak beste urtebeterako kontratua du oraindik, baina etxera bueltatzeko gogoa ere bai. Panathinaikosek eskaintza ere egin dio itxuraz, eta horrek bere erabakia azkartuko luke, Panathinaikos haren herriko talde handiena baita. Hamiltonek Milovan Rakovicekin egingo luke bikotea, eta 4 postuan, Axel Hervellerekin minutuak partekatuko lituzke.

Hirukoetan, %40

Hamiltonek saskipea du bizibide, baina Frantziako ligan nabarmen hobetu du hiruko jaurtiketen portzentajea, %40raino, eta horrek oso jokalari arriskutsu bilakatzen du. Txapelak jartzerakoan ere nahiko ondo moldatzen da, 1,4 jartzen baititu partidako. Bizkaiako hurrengo arreta gunea Kostas Vasileiadisen etorkizuna izan liteke. Normalean Bilbon geratuko da greziarra, baina Euroliga jokatuko duten talde batzuen eskaintzak ditu, eta horrek egoera baldintza dezake. Bizkaiak europarra ez den beste jokalari bat fitxatzeko aukera du oraindik.

Caja Laboralen, berriz, Andres Nocioniren erantzunaren zain segitzen dute. Urte baterako kontratu proposamena egin diote, baina hegaleko argentinarrak bi urtekoa eskatu dio Baskoniari, bere azken kontratu mamitsua izan daitekeelako. Bestalde, Luis Scola herrikideak Phoenix Suns taldean jokatuko du hurrengo denboraldian. Houstonek baliorik gabe utzi du taldearekin zeukan hiru urteko kontratua, eta Arizonako taldeak egin du eskaintzarik onena. Scolak 32 urte ditu, eta bost urte osatu ditu NBAn.