Lau euskal mendizaleak onik erreskatatu dituzte, Peruko Mendikate Zurian

Lau euskal mendizale erreskatatu dituzte asteburu honetan alturako gaitzak jota, Peruko Mendikate Zurian, hango Poliziak jakitera eman duenez. Lau mendizaleen familiek, ordea, ukatu egin dute inor alturako gaitzak jo izana, eta haien esanetan lauretako baten osasun arazoengatik eskatu zuten laguntza mendizaleek. Euri-jasa batek erreskate lanak zaildu arren, guztiak arriskutik kanpo daude. Asier Mediavilla, Laura Guey, Ekain Caigal, eta Eneko Arenaza dira onik atera diren lau mendizaleak. Azken hori dago hiruretako gaizkien. Nolanahi ere, azterketa medikoak eta erradiografiak egin dizkiote eta biriketan ez du edemarik. Bihar goizean, dagozkien azterketa medikuak eginda, lau gazteak Limarako bidean aterako direla aurreikusten da.