Lau pilotari ariko dira bakarrik BBK Mastersean

Egutegia Gabonetara iristen ari da, eta lau t'erdiko txapelketa bukatzeko finala falta denean, Enpresen Liga urteko azken torneoan pentsatzen jarria da: Buruz buruko BBK Mastersa. Aurten aldaketa nabarmena izango du, aurreko aldietako sei edo zazpi parte hartzaileen beharrean, lau baino ez baititu izango. Beraz, azken orduko aurre kanporaketaren bat egon ezean, finalerdiak eta finala jokatuko dira bakarrik.

BBK Mastersak pisu handia irabazi du azken urteetan, baina aurten data faltak torneoa murriztera behartuko du. Abenduaren 12an jokatuko da lau t'erdiko finala, eta binakakoa normalean urteko lehen astean hasten denez, bi asteburu daude bakarrik Mastersa kokatzeko. Hor, gainera, hainbat jaialdi berezi daude, Gabon egunekoa edo urteberrikoa kasu. Horiez gain, bestalde, Aspek baditu jaialdi erakargarri pare bat, Jon Jaunarenaren debutekoa kasu, hilaren 29an, edota Jose Javier Zabaletarena, urtarrilaren 5ean. Biak etorkizun handiko pilotariak dira, eta bien debuta jaialdiko estelarra izango da.

Gauzak hala, torneoa finalerdiak eta final izango ditu bakarrik. Lehen bi urteetan sei pilotarik jokatu zuten, iaz, berriz, zazpik, eta lehen partidak abenduko bigarren asteburuan jokatzen ziren. Hurrengo asteburuan, baina, bi jaialdi nagusiak lau t'erdiko bi finalek beteko dituzte. Gero, parte hartzaileei dagokienez, lau t'erdikoaren ondorengoen argituko dituzte. Asperen aldetik, Irujok jokatzeak garbia dirudi, ez ordea Xala egungo buruz buruko txapeldunordeak. Asegarcetik, aldiz, ezin da zehaztu, baina goizegi dirudi Olaizola II.a buruz buru jokatzen ikusteko.

Irujo, min txikiarekin

Juan Martinez de Irujok etzira arte ez du egingo du lehen pilotaleku saioa finalaren aurretik. Iberokoak eskuin eskua apur bat minduta du eta atseden eman nahi dio. Dena den, bere parte hartzea ez dago kolokan, eta enpresan ez dute ustea atzerapenik eskatuko duenik. Abel Barriolak, berriz, gaur bertan egingo du lehen entrenamendua Atanon. Bigarrena, berriz, astelehenean egingo du ziur asko. Finalaren aurretiko azkena izango da. Azkenik, ez batak ez besteak ez du asteburu honetan jokatuko.