Laugarren dema galdu du jarraian Lagun Arok, eta gora ez, behera begira jarri da

Lagun Arok Kopa behin betiko ahaztu, eta zeregin garrantzitsuagoetan murgildu beharko du burua aurrerantzean. Jaitsiera postuei gehixeago erreparatzean, besteak beste. Laugarren partida galdu zuten jarraian gipuzkoarrek, eta Bartzelonaren bisitaren zain, 7-10 balantze kezkagarriarekin itxi dezakete lehen itzulia. 88-72 galdu zuen Zaragozan, eta taldeak jaurtiketetan lortutako portzentaje eskasak desorekatu zuen balantza etxekoen alde: %42.

Doblas, Miralles, Panko eta Salgado gaizki aritu ziren. Pankok %11 bakarrik saskiratu zuen, eta Doblas, Miralles eta Salgadok%30etik behera. Salgadoren parekoek, aldiz, partida bikaina egin zuten. Quinterosek 27 puntu saskiratu zituen (37ko balorazioa), eta Cabezasek 13. Hiru puntura ere hurbildu zen Lagun Aro, 65-62, baina mina ematen duen zigorra jaso zuen azkenean: 88-72.