Hamargarren zortzimilakoa da Txikonentzat. Nepalen 12:00ak zirela, Euskal Herrian 08:25 inguru, Lemoako alpinistak jakinarazi du 8.516 metroko mendiaren gailurrean zegoela. Jakinarazi du "oso gogorra" izan dela igoera, "muturreko hotza" izan dutelako, baina esfortzuak merezi izan duela nabarmendu du bere blogean.
Iragan larunbatean ekin zion Txikonek Lhotse igotzeari. Bilbotik Lhotsera euskaraz espedizioan joan da Himalaiara, eta Nuptse igo zuen lehenago. Igoera hartako bizipenak idatzita utzi zituen Txikonek BERRIAko Ibilkari kanalean duen atalean.
Broad Peak (2003), Makalu (2004), Cho Oyu (2004), Shisha Pagma (2007), Daulaghiri (2008), Manaslu (2008), Annapurna (2010), GI (2011) eta GII (2011) zortzimilakoak igoak zituen Txikonek, eta hamargarrena du Lhotse.
