Lizarrako lehen derbia

Itxakoren eta Bera Beraren arteko sasoiko lehendabiziko derbia jokatuko da gaur, Lizarrako kiroldegian. Bi taldeek indartsu hasi dute 2011-2012ko denboraldia, eta bide beretik jarraitu nahi dute, sailkapeneko goiko aldeari ihes egiten utzi gabe. Itxakok Gijon hartu zuen mendean aurreneko jardunaldian. Erraz, gainera. Bera Bera ere batere arazorik gabe nagusitu zen Kukullagaren aurkako derbian. Bertzelakoa izanen da gaurko partida, segur aski. Itxako Bera Bera baino koska bat gorago egon arren, lehia handiko norgehiagoka espero dute bi taldeek.

Gaurko derbia berezia izanen da Itxakoko eta Bera Berako hainbat jokalarirentzat. Zulai Agirrek lehen sasoia du oraingoa Lizarran. Aurretik, hamabi denboraldiz izan zen Bera Berako jokalaria. Taldekide ohien aurka jokatzea «berezia» izanen dela azpimarratu du asteon. «Partida hasten denean, hala ere, argi izanen dut zein den nire elastikoa», gaineratu du.

Itxakoko Patri Pinedok, bertzalde, Lizarrako taldeko jokalari ohi Eli Pinedo ahizpa bikia izanen du aurrean gaur pistan. Eli Danimarkatik itzuli da denboraldi honetan Donostian jokatzera. Patri Itxakora ailegatu zenean sasoi bakar batez izan zuten Lizarran elkarrekin aritzeko aukera. Gaur, pistan, aurkari izanen dira. Bera Beran bada aurretik Itxakon aritu zen bertze jokalari bat, Yamiley Rodriguez atezaina, alegia.

Itxakoko entrenatzaile Ambros Martinek bi huts nabarmen izanen ditu gaur taldea osatzeko, Nerea Penak eta Begoña Fernandezek lesioek jota jarraitzen baitute. Ondorioz, Nekane Teres gaztea deialdian sartu du Martinek, berriz ere.

Reyes Carrerek zuzentzen duen taldean, berriz, Antonella Mena eta Alba Menendez daude min hartuta. Carrerek argi du Itxako dela faborito gaurko partida irabazteko, baina aurkaria ezustean hartzeko prest da: «Partida osoa egin behar dugu».

ITXAKO-BERA BERA

Itxako. Milenkovic, Navarro, Barno, Egozkue, Teres, Planillo, P. Pinedo, Aguilar, Ramos, Tervel, Agirre, Alonso, Zebic, Martin, Fachinello eta Barbosa.

Bera Bera. Carvalho, Rubio, Cuña, Arizaga, Punko, Zogbi, Altuna, Rodriguez, Eli Pinedo, Ziarsolo, Berta, Campa eta Fernandez.

Epaileak. Escudero anaiak.

Lekua. Lizarrerria kiroldegia.

Ordua. 18:30.