Lur jota dago Eibar, eta gaur Tenerifen ariko da, bigarrenaren kontra

Jokatutako azkeneko lau partidak galdu ditu Eibarrek, eta horregatik dago jaisteko postuetan. Bai, bi lehia jarraian irabaziz gero postu horietatik aterako litzateke, baina une honetan lur jota daude jokalariak. Kontrarioak ez dira askoz ere gehiago izaten, baina beti galtzaile. Eta lur jota egoteko, gaurko partida ez da, ez, aproposena. Tenerifen ariko da Eibar, bigarrenaren etxean. Galduz gero, Carlos Pouso entrenatzailea kargutik ken dezakete. Gainera, entrenatzaile leioaztarra ez zen atzo oso baikor mintzatu: «Zaila izango da han irabaztea, oso zaila». Deialdia osatzeko ere lanak eduki ditu, eta bigarren taldeko Iriondo atzelaria eta Abaroa erdilaria deitu ditu.

Lanak izan ditu, Urzelai, Lombraña, Markel eta Insa lesionatuta daudelako, Biel Medina eta Raul Garcia zigortuta, eta Txikik arazo pertsonal bat daukalako.Damian Ismodes eta Rudy Carlier etorri berriak, berriz, Eibarren geratu dira. Taldea ez dago bere momenturik onenean Jose Luis Oltrak entrenatutako taldeari aurre egiteko. Azkeneko lau partidak galdu ditu, eta etxetik kanpo jokatu dituen azkeneko sei partidetan ez da gol bakar bat ere sartzeko gai izan. Horregatik, lehen itzulian bost puntu baino ez ditu batu Ipuruatik urrun.

Tenerifekoak, aldiz, puztuta daude. Taldeak gora egin du partidak jokatu ahala, eta denboraldiko sarrera onena espero dute Heliodoro Rodriguezen. Dena den, tentuz ibili beharko dutela adierazi du Oltrak, Eibar talde «oso astuna» delako. Etxean jokatutako azken hiru partidak irabazi ditu.

TENERIFE-EIBAR

Tenerife. Aragoneses; Marc Bertran, Sicilia, Luna, Hector; Oscar Perez, Richi; Juanlu, Alfaro, Kome; eta Nino.

Eibar. Zigor; Alvaro Martinez, Añibarro, Alaña, Ivan Romero; Larrazabal, Carmelo; Codina, Carlo Ruben, Sutil; eta Arruabarrena.

Epailea. Perez Montero.

Lekua. Heliodoro Rodriguez (24.000 ikusle).

Ordua. 18:00.